La radunanza generala da la SRG SSR Svizra Rumantscha ha elegì la nova suprastanza per il temp d’uffizi 2017-2020. Oscar Knapp da Scuol (tut a dretga) e vegnì confermà sco president. La suprastanza sa cumpona da (d.s.a.d.) Gion Cola, Gion Lechmann, Donat Nay e Beatrice Baselgia. Nov president dal cussegl dal public è Roger Tuor. El segua a Michael E. Spescha. Era elegids sun vegnids las commembras ed il commembers dal cussegl dal public e dal cussegl regiunal.

La directura da RTR, Ladina Heimgartner, ha mussà che RTR gudogna vi e pli public sin las purschidas multimedialas e sin ils chanals da medias socialas. Ultra da quai ha ella era annunzià che RTR emetta durant la stad en la televisiun in magazin d’actualitad sut il titel “Sil punct”. RTR correspunda uschia ad in giavisch che vegn exprimì gia dapi onns regularmain dal public. Premiera per questa emissiun da test è glindesdi, ils 4 da fanadur, a las 17.50 sin SRF1. Sin fundament da las experientschas vegn lura decidì sche “Sil punct” vegn realisà en l’avegnir sco element fix dal program da RTR

Il premi SRG.R è vegnì surdà a Clà Riatsch, professer per lingua e cultura rumanscha. Esther Krättli ha tegnì in laudatio originala e divertenta, Domenic Janett e ses uffants han dà in bel rom musical a la surdada dal premi.

Impressiuns da la radunanza generala