La SRG SSR Svizra Rumantscha (SRG.R) contribuescha cun ses engaschi er al mantegniment ed a la promoziun da la lingua e cultura rumantscha. Cun il premi ch'ella surdat dapi il 1960 mintg'onn undrescha la SRG.R persunalitads ed organisaziuns che s'engaschan per la cultura e la lingua da la Svizra rumantscha. Ils onurads dals ultims onns èn stads: 2016 Clà Riatsch, professer da romanistica, 2015 Corina Casanova, anteriura chanceliera federala ed il 2014 Iso Camartin, publicist e professer da romanistica.

Sut il presidi dad Oscar Knapp ha la suprastanza da la SRG.R surdà il premi per l'onn 2017 als organisaturs dals Dis da litteratura (www.disdalitteratura.ch). La SRG.R undrescha uschia ils responsabels dals Dis da litteratura – per uschè dir il "Soloturn dals Rumantschs" – per lur lavur instancabla. Cun grond engaschi persunal èsi reussì da sa far in num e da chattar renconuschientscha lunsch sur ils cunfins chantunals ora. Dal comite d’organisaziun dals Dis da litteratura fan actualmain part Laura Decurtins Rossert, Sara Francesca Hermann, Sereina Nay, Corina Schmed, Natalia Tuor ed enfin la fin da 2016 Maurus Candrian.

Dapi il 1990 porschan ils Dis da litteratura ina plattafurma ad auturas ed auturs sco er als amaturs da la litteratura rumantscha. Sco occurrenza culturala promovan els era la schientscha da la Svizra rumantscha per l'atgna cultura. Onn per onn vegnan preschentadas, discutadas ed era premiadas novas ovras litteraras ed ovras da la scienza litterara. Ils Dis da litteratura han mintgamai lieu il november a Domat. Impressiunanta n'è betg mo la perseveranza dals organisaturs, mabain era la popularitad extraordinaria e cuntinuanta dals Dis da litteratura – e quai betg mo tar l'elita arrivada, mabain era tar ils litterats pli giuvens ed anc nunenconuschents. Grazia al grond engaschi dal comité d'organisaziun e grazia ad ina stretga collavuraziun cun las medias – tranter auter cun Radiotelevisiun Svizra Rumantscha/RTR – èsi pussaivel da cuntanscher in public fitg vast.

La surdada festiva dal premi è stada a chaschun da la radunanza generala annuala da la SRG SSR Svizra Rumantscha (SRG.R) ils 17 da zercladur 2017 a La Punt Chamues-ch. Il premi è dotà cun 8000 francs.

Da sanestra a dretga: Mevina Puorger, editura e docenta da rumantsch a l’Universitad da Turitg, Gianna Olinda Cadonau, autura, als Dis da litteratura 2016.

Sin la fotografia survart: Benedetto Vigne, Iso Camartin, Laura Decurtins, Natalia Tuor, Sara Hermann ed Oscar Knapp suenter la surdada uffiziala.