Berna, ils 31 da schaner 2018

Votaziun davart il futur da las medias publicas en Svizra
Iniziativa dal pievel: «Gea per abolir las taxas da radio e televisiun (Abolir las taxas Billag)»

Preziadas commembras e preziads commembers da l'uniun SRG SSR
Ils 4 da mars 2018 voteschan il pievel ed ils chantuns davart l'iniziativa No Billag. Quella vul abolir las taxas da radio e televisiun. Il text da l'iniziativa pretenda che la Confederaziun na dastga betg pli subvenziunar staziuns da radio e televisiun – e quai gia a partir dal 1. da schaner 2019.
L'iniziativa destruescha il fundament dal sistem medial dual svizzer cun medias privatas e publicas ch'è sa cumprovà fin ussa. In GEA na privass betg mo la SSR d'ina gronda part da sias entradas ed uschia da sia basa d'existenza, mabain era 34 staziuns da radio e televisiun privatas. En cas che l'iniziativa No Billag vegniss approvada, fiss quai il cumenzament d'ina commerzialisaziun cumpletta dal sistem medial svizzer che avess consequenzas gravantas. Ina purschida audiovisuala vasta e variada per tut las regiuns linguisticas da la Svizra – e la SSR sco instituziun credibla e fidabla – na dessi betg pli. La plazza mediala svizra vegniss uschia indeblida e cun ella nossa democrazia.
Ils plans preschentads da l'Uniun svizra d'artisanadi e mastergn (SGV/USAM) n'èn betg realistics: las entradas da la reclama na pon betg vegnir amplifitgadas tenor plaschair sin in martgà pitschen quadriling sco la Svizra, cun ina concurrenza a l'exteriur finanzialmain solida e da medema lingua. En cumbinaziun cun purschidas da pay-tv è quai impussibel. Era pajaments directs da la Confederaziun e dals chantuns per tschertas emissiuns u regiuns cuntradin al text da l'iniziativa.
In GEA ils 4 da mars 2018 signifitga in'annullaziun sperta e structurada da la SSR. La SSR è averta da discutar vastamain sia incumbensa da prestaziun en il rom da la nova lescha da medias. Questa avertadad orientada al futur e la prontezza da midament n'han però da far nagut cun in'alternativa a No Billag. L'iniziativa No Billag è radicala, perquai ch'ella prenda il fundament a refurmas necessarias da la SSR ed a la finanziaziun da medias publica. Quai ch'ins ha destruì na po betg pli vegnir refurmà.

Nus As engraziain per Voss engaschi e per Voss NA a No Billag a chaschun da questa votaziun existenziala per la SSR e per la plazza mediala svizra. Mintga vusch quinta!