Ina elecziun, in engraziel ed ina surdada dal premi SRG.R 2018 - quai èn stadas las ingredienzas principalas da la radunanza generala 2018 a Landquart. Il candidat che la suprastanza da la SRG.R aveva proponì, Vincent Augustin è vegnì elegì unanimamain da las 68 persunas preschentas cun dretg da vuschar. Suenter che la directura da RTR, Ladina Heimgartner ha dà in sguard enavos ed enavant sin las fatschentas da RTR ha ella engrazià a moda speziala al president partent. Ensemen cun la directura è sa furmà in entir chor che ha chantà chanzuns che han da far cun diversas staziuns da la vita dad Oscar Knapp. In mument fitg emoziunal. Per emoziuns han er ils uffants dal "chor d'affons Sumvitg" procurà - els han pudì prender encunter il premi SRG.R 2018 ed han engrazià cun diversas chanzuns da lur repertori. Bels pleds da laudatio ha il cusseglier naziunal Martin Candinas chattà. El saja losch da pudair far la laudatio per quest chor che deriva da sia patria. I saja propi da smirvegliar che quest chor attiria tants uffants da Sumvitg e conturn. Quai saja franc er il merit dals organisaturs, en spezial da la dirigenta actuala Flavia Walder-Hublard. Il chor po festegiar quest onn ses 20avel anniversari.

Passa 100 persunas èn sa radunadas la sonda, ils 26 da matg en l'auditori Weber dal Plantahof a Landquart per la radunanza generala 2018. La tractanda principala è stada l'elecziun d'in nov president. La radunanza ha elegì l'advocat Vincent Augustin da Mon ch'era vegnì proponì da la suprastanza. El succeda ad Oscar Knapp da Scuol che terminescha sia perioda d'uffizi la fin da quest onn. La directura da RTR, Ladina Heimgartner ha purtà in engraziel fitg tut spezial ensemen cun collavuraturas e collavuraturs da RTR. Els han furmà in pitschen chor che ha chantà in medley da chanzuns che han da far cun differentas staziuns da vita dal president Oscar Knapp, che ha lavurà avant sco ambassadur en divers pajais. Il premi SRG.R 2018 è vegnì surdà ufficialmain al "chor d'affons Sumvitg" che stat sut la batgetta da Flavia Walder-Hublard. Sa chapescha ch'il chor è er sa preschentà cun intginas chanzuns da ses repertori fitg vast. La laudatio ha il cusseglier naziunal Martin Candinas fatg. El, ch'è sez creschì si en la vischnanca da Sumvitg, ha numnà ils success dal chor e punctuà che quest success saja mo pussaivel entras l'engaschi da in e scadin. I saja propi da smirvegliar ch'ina vischnanca sco Sumvitg possia motivar passa 60 uffants da chantar en in chor, e quai, malgrà che la purschida da passatemps daventa pli e pli vasta.