En in vitget en Surselva vegnan regularmain chattads animals cun chommas tagliadas giu. La pitschna cuminanza è tementada. Entant che plirs abitants crain vi d’in mitus emprova il policist da sclerir il cas, quai però senza success. Ils mazzaments s’augmentan sco er la disfidanza dals abitants dal vitg. La seria finescha cun ina catastrofa durant la festa dal vitg. La seria è vegnida filmada dals 20 da zercladur enfin ils 5 d’avust en ils vitgs da Vrin e Lumbrein en Val Lumnezia. La seria-web è vegnida producida da RTR en collavuraziun cun la firma da producziun «Filmgeberei GmbH» ed ils dus reschissurs Carlo Beer ed Urs Berlinger.

Ils reschissurs Carlo Beer ed Urs Berlinger han persvas

2019 ha RTR lantschà ina concurrenza per ina seria-web rumantscha. Dals dossiers inoltrads èn 6 vegnids tschernids ed ils auturs/las auturas èn vegnidas envidadas ad ina preschentaziun. Selecziunada è alura l’istorgia da Carlo Beer ed Urs Berlinger vegnida. L’istorgia ha persvas cun la tematica dal mitus rumantsch da la «Metta da fein» che prest mintg’uffant sursilvan enconuscha.

Quel mitus accumpogna mai gia dapi l’uffanza. Quella ditga ha adina fascinà mai. Or da quella raschun hai jau vulì integrar quel mitus en noss scenari, crear in’istorgia e prender las aspectaturas ed ils aspectaturs en quest mund, di Carlo Beer, il reschissur da la seria web.

Per la realisaziun da la seria-web ha RTR collavurà cun la firma da producziun «Filmgerberei GmbH». Quest team ha planisà e producì la seria dal casting fin al tagl final e collavura stretgamain cun il manader dal project, Flavio Deflorin da RTR. Per la filmada han els pudì incumbensar acturas ed acturs enconuschents sco Marietta Jemmi, René Schnoz, Curdin Caviezel e Roman Weishaupt.

«Metta da fein» era sin «Play Suisse»

Sper «rtr.ch» e «Play RTR» vegn la seria-web era preschentada sin la nova plattafurma da la SRG SSR «Play Suisse».«Play Suisse» è ina plattafurma da streaming cun cuntegns da tut las regiuns linguisticas e sa focusescha sin persunalisaziun e recumandaziun. Uschia po «Play Suisse» offrir ina selecziun curatada d’atgnas producziuns e da co-producziuns da tut las unitads d’interpresa da la SRG SSR. Quai èn films, serias, films documentars, reportaschas e perlas ord l’archiv.«Play Suisse» è unic, perquai che las utilisadras ed ils utilisaders pon scuvrir cuntegns e tematicas da l’entira Svizra, da tuttas quatter regiuns linguisticas da noss pajais: Tut ils cuntegns èn disponibels en lingua originala cun suttitels en tudestg, franzos e talian. Insaquants films pon ins era guardar cun suttitels rumantschs. Sper l’emprima producziun rumantscha «Metta da fein» datti da guardar ina schelta da films da «Cuntrasts», il film d’animaziun «Ma vie de Courgette» ed il film istoric da dus parts «Gotthard».

Las quatter episodas da la seria-web «Metta da fein» vegnan preschentadas a partir dals 13 da december 2020 sin www.rtr.ch, www.playsuisse.ch e sin l’app «Play RTR».

In mitus vegn leventà da mort en vita

«Metta da fein» è in mitus che è surtut enconuschent en la Surselva. La figura misteriusa e sgarschaivla spaventava surtut ils uffants. La figura misteriusa taglia giu las chommas als uffants che van tras il prà, avant ch’il pur ha segà quel.

Dapli infurmaziuns: RTR, Tamara Deflorin, scheffa communicaziun, tel. 058 136 30 23, tamara.deflorin@rtr.ch