Cun «SRG SSR On the Road to Basel: La Svizra unida en la musica» collia la musica las culturas ed ils linguatgs da noss pajais. La retscha d’occurrenzas è averta per tuttas e tuts. Ella celebrescha la diversitad musicala da la Svizra e dat ina plattafurma a la generaziun giuvna che stat en il center da quest’occurrenza. Da Lugano sur Cuira e da Losanna fin Basilea – la tura fa punts tranter talents e public cun vista sin l’Eurovision Song Contest (ESC) 2025, in mument istoric per la scena da musica svizra. «SRG SSR On the Road to Basel: La Svizra unida en la musica» è ina seria d’events da las societads regiunalas SSR Suisse Romande, SSR Svizzera Italiana CORSI, SRG SSR Svizra Rumantscha ed SRG Deutschschweiz cun sustegn da la SRG SSR e las interpresas RTS, RSI, RTR ed SRF.

Coesiun musicala sur ils cunfins linguistics

Dal schaner enfin il matg 2025 mainan 4 occurrenzas da musica ensemen artistas ed artists da tut las quatter regiuns linguisticas dal pajais. Il punct culminant da mintga etappa è la preschentaziun communabla d’ina nova interpretaziun en quatter linguatgs da la chanzun «Ne partez pas sans moi» (text: Nella Martinetti, musica: Atilla Sereftug), la quala ha gudagnà l'ESC l'onn 1988 entras l’interpreta Céline Dion. Directur artistic per questa nov’interpretaziun è Gjon’s Tears, ch’era stà finalist a l’ESC l’onn 2021. La tura vegn enritgida entras inscunters e discurs cun las artistas ed ils artists che dattan in’invista en lur mund musical ed en la scena da musica svizra. Tuns e maletgs d’archiv laschan plinavant reviver l’istorgia da la musica dal pajais e procuran per in liom tranter musica ed identitad naziunala.

In grond finale en il cor dal Eurovision Square

Il finale fulminant spetga ils 14 da matg 2025 en il rom dal ESC a Basilea. L’Eurovision Square sin il Barfüsserplatz è in palc da diversitad nua che artistas ed artists locals e regiunals sa preschentan en in’atmosfera festiva ed inclusiva. Quest’ultima etappa incarnescha il spiert da la tura: manar ensemen il public, surmuntar cunfins musicals e mussar la diversitad da giuvens talents svizzers.

In ferm engaschament per la scena da musica locala

Sch’i va per promover la scena da musica svizra, lura è la SRG SSR ina da las acturas principalas. Cun formats sco RTS Radar u SRF 3 Best Talent sustegna ella giuvens artists. Uschia è er Zoë Më, la chantadura che represchenta quest onn la Svizra al ESC, vegnida scuvrida da RTS ed SRF ed ha tranter auter survegnì l’onn 2024 la distincziun RTS Radar Artist. Ed er il giuven talent Nemo che ha gudagnà l’ESC 2024, era vegnì undrà gia il 2016 cun il premi da SRF 3 Best Talent Award. Quai ha avert ad el ina gronda plattafurma naziunala. Questas carrieras mussan la rolla impurtanta da la SRG SSR cu i va per scuvrir e promover talents locals per la tribuna internaziunala.

Cun «SRG SSR On the Road to Basel: La Svizra unida en la musica» cuntinuescha la SRG SSR questa missiun e metta en la glisch da rampa 4 musicist:as ambiziusas da tut las quatter regiuns linguisticas da la Svizra:

• Looppoli (Svizra taliana): in duo acustic che cumbinescha blues-soul, pop e jazz cun ina metoda innovativa per musica live.
• MATTIU (Svizra rumantscha): in artist cun in stil autentic, inspirà da sias ragischs en las muntognas e cun ina vusch marcanta ed impressiunanta.
• Marie Jay (Svizra romanda): Chantautura che scuvra in pop poetic cun emoziuns intensivas.
• Cachita (Svizra tudestga): Ina artista cun ragischs cubanas che maschaida pop, RnB e rap en tracks engaschads.