Tge fa RTR per ils giuvens?
Dapi bun trais generaziuns accumpogna RTR er ils uffants ed ils giuvenils da la Svizra rumantscha. L’entschatta han fatg las emissiuns Istorgina da buna notg per ils pitschnins e Battaporta, l’emissiun da radio per la giuventetgna. Ils uffants ed ils giuvenils d’ozendi èn digitals. Perquai è l’offerta da RTR oz era là, nua che ses public giuven è: en la rait.
Play Suisse e Play RTR per uffants e giuvenils La gronda purschida da differentas emissiuns e da films da tut las unitads d’interpresa che sa drizza ad uffants, a giuvenils ed a persunas giuvnas è era da chattar da tuttas uras sin las plattafurmas da streaming Play Suisse e Play RTR.
RTR – per uffants, geniturs e scolastas e scolasts
Sin rtr.ch/uffants chattan uffants e geniturs ina purschida da videos, audios e gieus auditivs sco er in lexicon, versets e paraulas en tut ils idioms rumantschs ed en rumantsch grischun. La paletta è vasta e pledenta tut ils uffants, da pitschen ensi. Qua chatt’ins era las istorgias tradiziunalas e classicas per uffants translatadas ed adattadas per rumantsch. L’offerta accumpogna ils uffants en lur lingua materna durant quel temp decisiv dal svilup. Era per famiglias che na vivan betg en il territori rumantsch porscha questa offerta in bun access al mund rumantsch. Senza la purschida da RTR n’avessan ils uffants rumantschs quasi nagins products audiovisuals en lur lingua.
RTR – per scolaras e scolars
Il Minisguard è l’emissiun d’infurmaziun per scolaras e scolars. Ella tematisescha novitads regiunalas, naziunalas ed internaziunalas e rapporta a moda clera, chapibla e divertenta da la politica, l’economia, la cultura e la societad. Las contribuziuns gidan ils uffants da chapir meglier las novitads, ils fatgs da lur conturn e da l’entir mund. Ina fin duas giadas l’onn va la redacziun en ina scola rumantscha e creescha l’emissiun directamain cun ils uffants. Questa emissiun sa numna RTR sin visita e vegn transmessa sco usità la sonda a las 17:40 sin SRF 1. L’idea è d’esser pli datiers al public il pli giuven, da mussar la lavur davos las culissas e da sensibilisar ils uffants per las professiuns tar RTR.
Far medias cun RTR En divers formats d’emissiun interactivs e cun projects specifics pussibilitescha RTR a la giuventetgna d’experimentar cun differentas medias sco era da sa scuntrar e da sa barattar en in mund virtual. Classas da scola profiteschan dad InterMedia. En singulas lecziuns emprendan scolaras e scolars cumpetenzas impurtantas per il mund da las medias e sa fatschentan cun differents temas sco fakenews e cun tools per realisar videos. En nossa Metalounge RTR pon scolaras e scolars plinavant emprender cumpetenzas medialas cun agid da virtual reality: en ina stanza virtuala pon ellas ed els sa mover durant ina lecziun, tscherner in avatar, guardar videos e communitgar in cun l’auter. Igl è in’experientscha interactiva che divertescha ed infurmescha il medem mument
RTR – per la giuventetgna
En differents podcasts sco per exempel Ils dus da nus u Pausa cun Nina discutan giuvnas schurnalistas e giuvens schurnalists temas actuals cun la giuventetgna e partan ils cuntegns surtut sin Play RTR e sin Instagram. Il format Clic è ina rubrica da reportaschas dal punct da vista da la reportra u dal reporter che s’occupa cun temas che fatschentan els e lur conturn. Las reportaschas da Clic cumparan ina giada il mais. Era cun livestreams d’occurrenzas da sport, cultura, politica e la societad sco per exempel dal Big Air a Cuira ubain da l’Open Air Lumenzia stgaffescha RTR regularmain eveniments communabels che pledentan en emprima lingia la giuventetgna. RTR realisescha ultra da quai serias ficziunalas e digitalas. Suenter la seria-web Metta da fein è vegnì emess il 2023/24 sin differents chanals da la SRG SSR il drama da famiglia L'ultim Rumantsch. Ina finamira da quellas novas serias è era da promover giuvens talents rumantschs en il mund dal film.
RTR – per portas avertas
RTR dat invista en il mund da las medias audiovisualas e tgira il dialog direct cun la generaziun giuvna. Var 1000 persunas visitan mintg’onn la chasa da medias RTR: tranter auter blers uffants e giuvenils en il rom da visitas cun la classa u d’emnas da project. Durant il pass da vacanzas avra la chasa da medias las portas per uffants ed organisescha durant plirs dis visitas guidadas sco era workshops da montar radios DAB+.
RTR – ina patruna fidada ed attractiva
RTR porscha a la giuventetgna rumantscha perspectivas professiunalas interessantas ed attractivas e quai cun fufragnadis, emprendissadis, praticums e plazzas da lavur en passa 30 differentas professiuns sco per exempel schurnalista, moderatur, documentalista, informaticher, dunna da camera, realisatur da tun, contabilista, euv. Mintg’onn lavuran var 80 emprendistas ed emprendists sco era 95 praticantas e praticants tar la SRG SSR. Tar RTR èn quai quatter persunas en plazzas d’emprendissadi e sis persunas en plazzas da praticum (stadi: mars 2023).
Artitgel 13 or da la concessiun:
Purschida per persunas giuvnas 1. La SRG SSR metta a disposiziun purschidas che s’orienteschan a la realitad da la vita ed als interess da las persunas giuvnas. Ella porscha ad ellas in’orientaziun confurma a la vegliadetgna e promova lur participaziun a la vita politica, economica, culturala e sociala. 2. Ils cuntegns, ils formats e la tecnica da las purschidas vegnan elavurads e derasads uschia ch’els correspundan a las disas d’utilisar medias da la giuvna gruppa en mira.