Tge fa RTR per la religiun
RTR è la patria rumantscha en tun, text e maletg. Nus purschain in accumpagnament al radio da 24 uras, emissiuns da televisiun regularas ed in’offerta digitala attractiva. RTR reflectescha regularmain era dumondas religiusas ed eticas ed è en dialog cun las persunas che represchentan las differentas confessiuns. Cun derasar ses programs sin plaun naziunal ed a moda digitala e cun suttitular sias emissiuns (teletext 777 u suttitels averts) renda RTR visibla la cultura indigena e fa attent ad ella, e quai sur ils cunfins linguistics e geografics.
Ina tematica francada en la populaziun
Il 2021 ha ina retschertga davart l’appartegnientscha religiusa mussà che ina cumpart da la populaziun da stgars 34% è catolic-romana, da stgars 22% evangelic-refurmada, da passa 5% muslima e da var 1% hinduistica e budistica. Ina cumpart da la populaziun da 0,2% è gidieua. Var 31% n’inditgeschan nagina appartegnientscha religiusa. 40% da la populaziun frequentan ina fin tschintg giadas l’onn in servetsch divin.
Funtauna: Uffizi federal da statistica – enquista da structura (appartegnientscha religiusa 2019– 2021)
RTR – Vita e cretta Il magazin
Vita e cretta sa fatschenta emna per emna durant in’ura cun las dumondas fundamentalas da nossa vita, cun la cretta, ils dubis, la fortuna ed ils differents rituals che structureschan noss mintgadi. Il magazin dat impuls ed invistas, analisescha e discuta dumondas dal mund religius, da l’etica, da la teologia e da las differentas Baselgias. In exempel è l’emissiun dad Isabelle Jäger cun l’astrofisicher Thomas Zurbuchen che dat in sguard en l'infinitad dal spazi. L’emissiun Vita e cretta cumpiglia contribuziuns schurnalisticamain independentas ed in bloc da novitads che reguardan las religiuns. Ultra da quai datti cun il Pled sin via mintg’emna in impuls da tempra religius-meditativa.
RTR – in Pled sin via
En l’emissiun Vita e cretta vegn a pled mintga dumengia u in plevon u ina plevonessa, ina preditganta u in preditgant, ina catecheta u in catechet u ina persuna giuvna che sa fatschenta cun dumondas etic-religiusas. RTR collavura cun var 12 persunas dal fatg externas che dattan cun curtas meditaziuns invistas ed impuls a l’auditori. Quatter giadas l’onn producescha RTR er in Pled sin via televisiv che vegn emess sin SRF 1.
Colliaziuns structuralas cun las Baselgias
Per ademplir l’incumbensa programmatica lavura la SRG SSR punctualmain cun las Baselgias. Questa collavuraziun è però differenta da regiun a regiun. Tar RTR s’inscuntra la redacziun spezialisada ina gida l’onn cun la cumissiun ecclesiastica.
RTR – valurs, etica e religiun en il program da mintgadi
Dumondas en connex cun valurs, etica e religiun èn dentant era preschentas en noss program quotidian. Noss magazins d’actualitad rapportan e discutan per exempel davart decisiuns da las Baselgias chantunalas e naziunalas u davart lur posiziuns en dumondas socialas e politicas. La Baselgia, la religiun e dumondas eticas èn tema era regularmain en diversas emissiuns da profundaziun u durant emnas tematicas da RTR.
Intgins exempels d’emissiuns e tematicas en quel connex:
▪ Cuntrasts da Petra Rothmund: Nossadunna – ina chara amia
▪ Cuntrasts da Paula Nay: Per amur da la pasch – in onn uvestg Joseph Maria Bonnemain
▪ Cuntrasts dad Isabelle Jäger: Dunnas e Dieu
▪ Vita e cretta dad Isabelle Jäger: Brinzauls, il privel da la spunda e la Baselgia