Tge fa RTR per il sport?
RTR rapporta dapi il 1925 al radio, dapi il 1963 en la televisiun ed ils ultims onns er online sin rtr.ch da differentas domenas da la vita e damai era dal sport en noss chantun. RTR mussa co e nua ch’il sport cun tut sias fassettas muventa il Grischun e tgira cultura, tradiziun ed usits sin quest sectur. Il sport è tema en differentas emissiuns ed en divers formats da RTR. Ina plazza fixa ha il sport en las emissiuns Sport ed actualitad mintgamai la fin d’emna, en las emissiuns d’actualitad ed en las novitads quotidianas. Nossas reportras e noss reporters da sport procuran che las diversas disciplinas sajan preschentas en ils programs da RTR. Ultra da las rapportaziuns dal sport naziunal ed internaziunal metta RTR in focus spezial sin il sport regiunal.
La Svizra – ina naziun da sport
75% da la populaziun svizra fan sport almain ina giada l’emna e 51% pliras giadas l’emna. 16% sa movan perfin mintga di. Mo in quart da la populaziun svizra na fa nagin sport. Var 75% da las Svizras e dals Svizzers persequiteschan las novitads dal sport en las medias. Il sport sa drizza damai a las pli differentas gruppas socialas e quai independentamain da lingua, vegliadetgna, schlattaina e derivanza. Funtaunas: Sport Schweiz 2020 e SRG SSR
RTR – dapli che resultats e plazzas da podest
L’emissiun da radio Sport ed actualitad che vegn mintgamai emessa la fin d’emna dat infurmaziuns approfundadas e porscha in’offerta cumplessiva cun intervistas, purtrets e reportaschas d’atletas e d’atlets indigens sco era dals players impurtants en il sectur dal sport en il Grischun. Ultra da quai porscha RTR quatter giadas l’onn il podcast Sportlounge cun discurs ed infurmaziuns pli approfundadas.
RTR – livestreams per metter en il center il sport regiunal
RTR dat ina plattafurma audiovisuala al sport regiunal. Cun ils livestreams ch’i dat dapi il 2015 porscha RTR la pussaivladad da guardar il sport regiunal cura e nua ch’ins vul: sco public viewing, sin il telefonin ubain via HbbTV sin il visur grond. Tranter auter ha RTR emess il derby da ballape tranter l’US Danis-Tavanasa ed il CB Trun/Rabius, il derby engiadinais tranter l’EHC San Murezzan ed il Club da Hockey Engiadina, ils finals da la Cuppa grischuna da ballape u da nov er il Swiss Epic, la cursa da mountainbike da pliras etappas che maina dapi il 2019 mintgamai tras il Grischun. RTR rapporta dad eveniments da sport, dals quals autras medias na rapportan betg. Per RTR èn ils stars locals precis uschè impurtants sco ils stars naziunals ed internaziunals. RTR mussa emoziuns, idols ed eroxas ed eroxs grischuns.
Cifras or dal program
L’onn 2022 ha la SRG SSR emess passa 18’600 uras da sport incl. repetiziuns en la televisiun, al radio ed online – var 10’000 uras live. Via tut ils chanals linguistics regiunals da la SRG SSR vegnan damai emessas en media mintga di 27 uras sport live.
RTR – per in sport en tut sia diversitad RTR è là, nua ch’il sport regiunal muventa. Noss sports da tschep en cunzunt il ski alpin, il ski nordic, il biatlon, il ciclissem, il ballape, il hockey sin glatsch e la lutga. Cun tut ses vecturs (radio, televisiun ed online) è RTR la plattafurma la pli gronda e la pli cumplessiva – per uschè dir il pli grond stadion – dal sport regiunal grischun.
Sport – in’amur chara
Las reportaschas da sport en la televisiun èn cumplexas quai che reguarda la producziun ed ellas custan bler. En media cuvran la reclama ed il sponsoring mo 10 fin 20% dals custs totals per ils dretgs, la producziun e l’emissiun. Nagina chasa da medias privata na surpiglia producziuns da sport charas che n’èn betg rentablas. Senza l’engaschi da la SRG SSR na vegnissan blers sports ed eveniments betg transmess u transmess mo pli via pay-tv – ina perdita per il sport e per la Svizra.
RTR – ina partenaria fidada
RTR è partenaria da medias d’occurrenzas da sport pitschnas e grondas en il Grischun sco per exempel dal Maraton da skis engiadinais, da las cursas da currer Transruinaulta e Transviamala, da diversas festas da lutga, dal Big Air a Cuira e da nov era dal Swiss Epic. Uschia po RTR realisar producziuns e tgirar contacts directamain al lieu. Las organisaturas ed ils organisaturs profiteschan da la promoziun da lur occurrenzas en ils programs da RTR, per exempel en furma da trailers u d’avis a l’occurrenza.
Intgins exempels d’emissiuns e da tematicas dals onns 2023 e 2024:
▪ livestream e rapportaziun cumplessiva cun differentas partenarias e differents partenaris d’intervista a chaschun dal Swiss Epic tras il Grischun
▪ livestream dal derby da hockey engiadinais tranter il CdH Engiadina e l’EHC San Murezzan
▪ livestream dals finals da la Cuppa grischuna da ballape a Cuira
▪ radio maraton a chaschun dal Maraton da skis engiadinais
▪ la Sportlounge cun ils frars Sandro e Livio Simonet a la cuppa mundiala da skis
▪ l’emissiun dals Cuntrasts Tranter tradiziun e business – 100 onns Cuppa Spengler
▪ l’emissiun da la Marella Il goli – tranter erox e tabalori
▪ l’emissiun dal Profil Selina Gasparin – unifurma enstagl dress da cursa
▪ l’emissiun dal Profil Paul Friberg – «La legenda»
▪ l’emissiun dals Cuntrasts davart Nino Schurter e sia ultima cursa
Artitgel 10: Sport
1. La purschida en il sectur dal sport cuntegna en emprima lingia ils rapports davart: a. eveniments sportivs cun participaziun d’atletas e d’atlets svizzers sco era da teams svizzers; b. impurtantas occurrenzas da sport internaziunalas en Svizra; c. eveniments da sport impurtants tenor l’agiunta 2 da l’ordinaziun dal DATEC (UVEK) dals 5 d’october 2007 (CS 784.401.11) davart radio e televisiun.
2. La SRG SSR resguarda en sia purschida en il sectur dal sport era sports da massa e sports pauc derasads.
3. Ella sa stenta da cooperar cun auters organisaturs svizzers quai che reguarda l’acquisiziun da dretgs.