Tge fa RTR per las regiuns?

RTR è al puls dal Grischun:

Tge muventa la populaziun da nossas regiuns? Tge dumondas en connex cun la politica, l’economia, la convivenza, la cultura ed il sport occupan ella? RTR drizza il focus sin las regiuns e metta ellas en il center da ses programs:

▪ RTR tematisescha las sfidas ed ils success da noss commerzi indigen – en il sectur da las interpresas pitschnas e mesaunas, dal turissem, da l’agricultura, da l’industria pitschna – ma era da la furmaziun e da la sanadad.

▪ RTR maina ed intermediescha la debatta davart dumondas politicas e davart la convivenza en noss chantun.

▪ RTR explitgescha ed accumpogna la tgira ed il svilup da nossas tradiziuns, da nossa cultura e da noss sport. Grazia ad ina rait da correspundentas e da correspundents che vivan e lavuran en las regiuns garantescha RTR infurmaziuns e rapports d’emprim maun. Saja quai da radunanzas communalas, d’occurrenzas culturalas u a chaschun d’inscunters e da visitas spezialas. Qua tras stgaffescha e rinforza RTR l’identitad rumantscha e promova la debatta ed il discurs democratic er en las regiuns. In terz da l’infurmaziun sin tut ils vecturs da RTR pertutga il Grischun. Cun in accumpagnament da radio da 24 uras a di, cun emissiuns da televisiun regularas ed ina purschida digitala collia e reflectescha RTR il Grischun e la Svizra rumantscha a moda cumplessiva e cun tut lur fassettas.

RTR – da la regiun per la regiun

Dapi sia entschatta metta RTR en il center las regiuns ed ha rinforzà là successivamain sia preschientscha. RTR è adina al lieu. Cun nizzegiar novas tecnologias porscha RTR oz a ses public eveniments cuminaivels da la regiun e quai en il sectur da la cultura, dal sport, da la politica e da l’economia. Exempels èn las debattas davart las elecziuns naziunalas ed ils livestreams da gieus da hockey sin glatsch en l’Engiadina, da gieus da ballape e da festas da chant.

RTR – per l’independenza e la democrazia en las regiuns

RTR serva cun persvasiun a la societad e defenda las valurs democraticas en favur dad ella. Quai faschain nus cun in schurnalissem premurus e critic che approfundescha infurmaziuns, che classifitgescha fatgs e che preschenta raschuns d’interess particulars a moda gista ed independenta. RTR sustegna il process da furmar l’opiniun ed è ina funtauna d’infurmaziun independenta e fidada per nossa populaziun

RTR – per ina ferma regiun e per in ferm chantun

RTR garantescha ina ferma plazza da medias grischuna, è ina patruna da lavur impurtanta ed ina partenaria relevanta per il commerzi indigen.

RTR ...

▪ offra ina purschida da programs cumplessiva, attractiva ed independenta.
▪ ha experientscha ed in know-how da passa 90 onns.
▪ cooperescha e tschertga sinergias cun autras chasas da medias en il Grischun, sco per exempel cun la Fundaziun Medias Rumantschas FMR.
▪ è ina patruna fidada ed attractiva e porscha plinavant a la giuventetgna rumantscha perspectivas professiunalas interessantas e quai cun fufragnadis, emprendissadis, praticums e plazzas da lavur en passa 30 differentas professiuns sco per exempel schurnalista, moderatur, documentalista, informaticher, dunna da camera, realisatur da tun, contabilista, euv.
▪ contribuescha a l’economia ed al commerzi grischun. Oz fatschenta RTR 167 persunas (126 plazzas cumplainas). Sche pussaivel resguarda RTR er il commerzi indigen. Ina buna part dals daners da taxas – generads en noss chantun – van uschia puspè enavos en l’economia da nossas regiuns, da noss chantun.

RTR – per ina memoria en tun e maletgs

Nossa istorgia è part da nossa identitad. Dapi decennis accumpogna e documentescha RTR la vita en nossas regiuns en tun e maletg. RTR è oz la memoria audiovisuala dal Grischun e da la Svizra rumantscha cun in archiv che cumpiglia documents dapi il 1925. L’archiv è ina funtauna unica che promova l’identitad e la schientscha per l’atgna istorgia. La plattafurma digitala nossaistorgia.ch è ina pagina trilingua (rumantsch, tudestg e talian), sin la quala RTR publitgescha singuls films ed emissiuns da radio or da ses archiv. Ma nossaistorigia.ch è dentant cunzunt ina plattafurma participativa per persunas privatas e per instituziuns (archivs culturals, uniuns, societads). Tuttas e tuts pon publitgar qua regurdientschas en furma da fotografias, films ed audios.

RTR – en barat e dialog cun las regiuns

RTR serva cun persvasiun a la societad e tgira il barat e l’inscunter cun ses public. Quai na fa RTR betg mo a moda digitala via medias socialas (TikTok, Instagram, euv.), mabain sche pussaivel adina er a moda analoga, en contact, en barat ed en dialog direct e persunal. RTR fa part regularmain d’occurrenzas en las regiuns, per exempel en il rom da premieras dad agens films, d’exposiziuns e d’occurrenzas da cultura e da sport. Nus essan al lieu ed en dialog cun il public, nus verifitgain nossa offerta ed integrain e resguardain giavischs ed impuls per sviluppar nossa purschida.

RTR – ina partenaria fidada

Sco partenaria da medias è RTR preschenta a numerusas occurrenzas da tut gener en nossas regiuns. Uschia po RTR realisar producziuns e tgirar contacts directamain al lieu. Las organisaturas ed ils organisaturs profiteschan da la promoziun da lur occurrenzas en ils programs da RTR, per exempel en furma da trailers u d’avis a l’occurrenza