La radunanza generala da la SRG.R, l'uniun purtadra da Radiotelevisiun Svizra Rumantscha, ha elegì Elena Luzio unanimamain sco nova presidenta. Ella suonda a Vincent Augustin che dat giu ses post la fin dal 2026 cunquai ch’el ha accumplì quest onn 70 onns. Elena Luzio ha 44 onns, è oriunda da Savognin ed abita a Turitg. Tranter auter ha ella fatg in «Executive Master of Business» a Son Gagl ed ha lavurà en differentas funcziuns directivas tar las Viafiers federalas e dapi il 2022 è ella commembra da la direcziun da Scheuchzer SA, ina firma cun radund 500 collavuraturas e collavuraturs. Il post sco presidenta da la SRG.R è in impurtant post, betg il davos perquai che questa persuna fa automaticamain er part dal Cussegl d'administraziun da la SRG SSR.

Il president partent, Vincent Augustin, resta anc en uffizi enfin la fin da l'onn 2026.

Cunquai che Elena Luzio surpiglia il presidi sin l'entschatta 2027 ha la radunanza gì d'eleger in'ulteriura persuna per la suprastanza. Per quel post ha la radunanza elegì Thomas Malgiaritta da Müstair. El è manader da la Banca Raiffeisen Engiadina Val Müstair. Plinavant è el president dal Cussegl d’administraziun da l’Academia Engiadina a Samedan. Thomas Malgiaritta ha 58 onns, è maridà ed ha 4 uffants creschids. El entra en uffizi l'emprim da schaner 2027.